فاكر زمان وانت صغير..
لما تعمل حاجة غلط أو ماتسمعش الكلام
وتكسل تعمل واجب المدرسة.. كان حد يقولك:
هحبسك في اوضة الفئران؟! ..
يؤسفنى أقولك يا عزيزي..
إن مفيش أوضة فئران ولا حاجة.. لكن غالباً
دي بتكون أوضة كراكيب قديمة بقالها وقت طويل مقفولة
فبقيت مليانة تراب وربماً حشرات كمان
ويمكن فعلاً جوه يكون في فئران فعلاً.. بس عارف؟
الفأر جبان جداً.. بمجرد ما تفتح الأوضة الضلمة دي
وتنور النور وتبدأ تحرك الكراكيب وتتعامل معاها ..
كل الحشرات مبدأيا هتهرب ( لانها فعلاً جبانة )..
في حياتنا اوقات كتير بيكون عندنا أوضة الفئران الخاصة بينا
اللي بنرمي فيها كل صراعات مش قادرين نواجهها
وكل مشكلة لسه ماتحلتش وكل موقف سببلنا ألم شديد
وإحنا قررنا نكبته وندفنه جوانا لحد ما قدم جداً
ولم حواليه تراب وحشرات وبقي ( أوضة فئران )
المهم انت بقى ناوي تعمل إيه في أوضة الفئران بتاعتك ..
هتفتحها وتطلع الحاجات اللي جواها وتتعامل معاها
ولا هتسيبها مقفولة تخوف بيها أولادك لما ييجوا !