بيسمي المسيحيين السبت اللي قبل سبت النور
( اليوم اللي سبق قيامة المسيح من الموت )
بـ سبت لعازر؟ عارفين ليه ؟ طب عارفين مين لعازر ده ؟
أقولكم أنا.. لعازر ده واحد كان المسيح بيزوره فى بيته
وبيقضي معاه هو وبيته ( إخواته مريم ومرثا ) اوقات كتير..
كانوا قريبين من المسيح، لكن في يوم مشئوم جداً مات لعازر
واتدفن بعد ما قعد وقت يصارع مع تعبه..
واللي حصل إن المسيح راح لبيته
لكن للأسف كان مر على دفن لعازر 4 أيام !
( في الوقت اللي كان في معتقد سائد إن روح الإنسان الميت
بتكون قريبة من جسمه لمدة 3 أيام وبعدها بتفارقه تمامًا )
لكن المسيح قرر يروح للقبر
اللي فيه جسد لعازر ( بحسب مفهومهم ) تعفن ،
وروحه فارقت جسمه تمامًا .. الوضع كان مؤسف جداً..
وهنا صرح المسيح بطلب غير متوقع تمامًا ( إرفعوا الحجر )!؟
أيوه.. وده اللي حصل ورفعوا الحجر وريحة صعبة من القبر فايحة ،
لكن صرخ المسيح بصوت عظيم ونادى لعازر وقاله ( يا لعازر، أخرج )
وخرج لعازر من القبر وانتصر بالمسيح على الموت ..
وعدى سبت لعازر وسبت النور وقام يسوع شخصيا من الموت
وإنتصر كمان مرة على الموت.. وده اعظم رجاء لينا
ولكل شخص بيخاف من الموت ،
المسيح انتصر على الموت وأقام لعازر من الموت
وهيقوم تانى من الموت كل اللى صدقوه ويعطيهم حياة ابدية 😍